சென்னை / திருவனந்தபுரம்: மலையாளத் திரையுலகைத் தாண்டி, தமிழ், தெலுங்கு என ஒட்டுமொத்த தென்னிந்திய ரசிகர்களின் மனதையும் கொள்ளையடித்த ‘பிரேமம்’ (Premam) திரைப்படம் வெளியாகி இன்றுடன் வெற்றிகரமாக 11 ஆண்டுகளை நிறைவு செய்துள்ளது. அல்போன்ஸ் புத்திரன் இயக்கத்தில், நிவின் பாலி நடிப்பில் வெளியான இத்திரைப்படம், இன்றும் ரசிகர்களின் ‘ஆல்-டைம் பேவரைட்’ காதல் காவியமாகத் திகழ்கிறது.
மூன்று கால கட்டத்து காதல்
காதலின் வெவ்வேறு பரிமாணங்களை மூன்று வெவ்வேறு காலகட்டங்களில் (பள்ளிப் பருவம், கல்லூரிப் பருவம், அதற்குப் பிந்தைய பருவம்) ஒரு மனிதனின் வாழ்க்கைப் பயணமாக விவரித்திருந்தது ‘பிரேமம்’. ‘ஜார்ஜ்’ என்ற கதாபாத்திரத்தில் நிவின் பாலி, தனது அசாத்திய நடிப்பால் ரசிகர்களைக் கவர்ந்தார்.
இப்படத்தின் மூலம் அறிமுகமான சாய் பல்லவி (மலர் டீச்சர்), மடோனா செபாஸ்டியன் (செலின்), அனுபமா பரமேஸ்வரன் (மேரி) ஆகிய மூவருமே தங்களது எதார்த்தமான நடிப்பால் தென்னிந்திய அளவில் மிகப்பெரிய நட்சத்திரங்களாக உயர்ந்தனர்.
தமிழகத்தில் படைத்த அசாத்திய சாதனை
ஒரு மலையாளத் திரைப்படம் கேரளாவை விடத் தமிழ்நாட்டில் மிக நீண்ட நாட்கள் ஓடி சாதனை படைத்தது என்றால் அது ‘பிரேமம்’ தான். சென்னை எக்ஸ்பிரஸ் அவென்யூ மாலில் உள்ள தியேட்டரில் இத்திரைப்படம் தொடர்ந்து 300 நாட்களுக்கும் மேல் ஓடி, தமிழ் சினிமா வரலாற்றிலேயே புதிய வசூல் மற்றும் திரையரங்கு சாதனையைப் படைத்தது.
‘மலரே’ பாடலும், தாடி வைத்த ஜார்ஜும்
இப்படத்திற்கு மிகப்பெரிய பலமாக அமைந்தது ராஜேஷ் முருகேசனின் இசையும் பின்னணி இசையும் தான். குறிப்பாக, விஜய் யேசுதாஸ் பாடிய “மலரே நின்னே காணாதிருந்தான்” என்ற பாடல் வெளியான சமயத்தில் பட்டிதொட்டியெங்கும் ஒலித்து, ஒரு தேசியக் கீதம் போலக் கொண்டாடப்பட்டது.
இப்படத்தில் நிவின் பாலி கறுப்புச் சட்டை, வேட்டி மற்றும் அடர்ந்த தாடியுடன் கல்லூரிக்கு வரும் ‘மாஸ்’ தோற்றம், அப்போது இருந்த இளைஞர்கள் மத்தியில் மிகப்பெரிய ஃபேஷன் ட்ரெண்டாக மாறியது.
